Основниот кривичен суд Скопје донесе ослободителна пресуда за поранешниот премиер Никола Груевски во повтореното судење за предметот „Талир 2“, кој се однесуваше на изградбата на седиштето на ВМРО-ДПМНЕ. Политички мотивиран случај со кој требаше да се наштети на партијата, иако таа не беше дел од процесот.
Судијката Даниела Алексовска-Стојановска образложи дека пресудата е директна последица на измените на Кривичниот законик од 2023 година, кои, иако на прв поглед изгледале минорни, суштински влијаеле врз елементите на кривичното дело. Таа посочи и дека Обвинителството ниту во повторената постапка, ниту во завршниот збор не го приспособило обвинението на законските измени.
Со оглед дека предметот застарува за околу еден месец, дури и евентуална жалба до Апелациониот суд нема да може да ја промени конечната разврска.
Со оваа пресуда паѓа политички монтираниот случај против ВМРО-ДПМНЕ, која не ни беше обвинета во процесот, и конечно по осум години ќе може да располага со своето седиште – „Белата палата“, проценето на околу 14 милиони евра, како и со останатиот партиски имот вреден околу два милиони евра, кој беше предмет на постапката и беше под ризик од конфискација.
