Економски раст од над 3 , наместо 1,8 отсто, инфлација од 4,8 наспроти 14,2 проценти и јавен долг од 58,9% отсто од БДП. Министерката за финансии со факти за позитивните економски перформанси во две години од функционирањето на владата. Димитриеска Кочоска вели главен приоритет и било стабилизирање на јавните финансии, воведување поголема контрола и спречување на нерегуларностите. Истакна дека МФ вратило 4,4 милијарди евра долгови од претходната влада, а до крајот на годината треба да се отплатат уште речиси милијарда евра. Капиталните инвестиции се реализираат забрзано, а до крајот на годината нема да има нови долгови, туку само задолжување надвор, наместо на домашниот пазар.
„Во периодот што следува ќе продолжиме со фискалната консолидација, со дигитализацијата на јавните финансии, со борбата против сивата економија, со подобрување на даночната администрација, со модернизација на финансискиот систем и со создавање уште подобри услови за домашните и странските инвеститори“ – рече Гордана Димитриеска Кочоска – министерка за финансии.
Министерката за финансии е задоволна од тоа како се полни државната каса. УЈП наплатила за 14,45 отсто повеќе данок на добивка во првите 6 месеци. Директорката на УЈП вели дека резултатот бил подобрен поради повисоките добивки на фирмите. Април бил рекорден во 5 години наназад. Наплатата на придонеси била поголема за 7,6 отсто, а повеќе пари се собрале и од ДДВ и данок на личен доход.
Јуни бил рекорден месец за царината. Управата наплатила вкупно 208 милиони евра. Директорот вели дека во 6 месеци биле собрани 50 милиони евра повеќе од истиот период лани.
Министерката за финансии очекува и поголеми приливи во буџетот од дополнителниот данок за 2024та по воведување на минимален глобален данок. Рокот за пријавувањње е до крајот на годината, а според пријавите досега ќе се наплатат најмалку 14 милиони евра.
Од финансии додаваат дека министерството било главен двигател во исполнувањето на реформската агенда со исполнети 8 од 22 исполнети чекори. Димитриеска Кочоска најави нова анализа на ММФ за стабилноста на пензискиот систем. Напомена дека речиси секогаш тие бараат зголемување на старосната граница за пензионирање, но и тоа дека таа е на ставот да нема промени, освен за оние луѓе кои доброволно сакаат да продолжат да работат и по 62, односно 64 години.
