Во близина на доцноантичкиот град Баргала, штипските археолози открија некропола со гробници за кои се претпоставува дека датираат од четвртиот до шестиот век. Станува збор за локалитетот „Џамалџиски гробишта“, кој, според првичните сознанија, се простира на најмалку пет хектари. Археолозите велат дека, според она што досега е откриено на терен, не е исклучено некрополата да зафаќа и поголема површина.
„Откриени се седум до осум гробови и мала гробница. Досега немаме откриено монети, предмети, освен фрагментирана керамика која укажува на тој период. Меѓутоа, типовите на овие гробници соодветствуваат со доцната антика“, изјави Митко Штерјов, археолог во Музеј на град Штип.
За попрецизно датирање на гробовите ќе бидат потребни дополнителни антрополошки и научни анализи на човечките коски. Археолозите не ја исклучуваат можноста локалитетот да крие и постари археолошки наоди. Невообичаената поставеност на дел од гробниците остава можност тие да потекнуваат и од период пред доцната антика.
„Можеби овде ќе се најдат и постари гробници и ќе го вратиме периодот малку поназад. Бидејќи во околината на овој простор имаме и железнодобски населби и гробишта. Со понатамошните истражувања можеби ќе можеме и назад да се вратиме и да докажеме дека животот постоел и многу порано, во третиот век, кога Баргала почнала да опстојува како цивилна населба“, изјави археологот д-р Митко Штерјов.
Археолошките истражувања на локалитетот ќе продолжат и во наредниот период, со цел да се утврдат неговиот целосен обем и значење. Инаку, уште во 2012 година на „Џамалџиски гробишта“ биле регистрирани нелегални ископувања од страна на диви копачи, по што локалитетот е евидентиран од археолозите.
