Советот на Општина Ѓорче Петров денеска одржа вонредна седница на која биле донесени одлуки за формирање Комисија за процена на штети и доделување хуманитарна помош за Општина Гостивар.
-Советот донесе Одлука за формирање Комисија за процена и утврдување на висината на штетата настаната од природни непогоди и други несреќи. Комисијата ќе биде надлежна за процена на штетите на територијата на Општина Ѓорче Петров, нивно евидентирање и изготвување збирен извештај, согласно законските прописи и утврдената методологија. На истата седница, Советот донесе и Одлука за доделување хуманитарна помош во износ од 300.000 денари за граѓаните на Општина Гостивар погодени од загадувањето на водата за пиење. Средствата ќе бидат обезбедени од Буџетот на Општина Ѓорче Петров и ќе бидат уплатени преку Фондот на солидарност на Црвениот крст на Република Македонија – информираат од прес-службата на Општина Ѓорче Петров.
Со овие одлуки, како што посочуваат, Општина Ѓорче Петров уште еднаш ја потврдува својата посветеност кон навремено справување со последиците од природните непогоди на својата територија, но и кон меѓусебната солидарност и поддршка кога граѓаните во другите општини се соочуваат со сериозни предизвици.
-Општина Ѓорче Петров ќе продолжи одговорно да постапува во интерес на граѓаните и да придонесува кон заедничко надминување на последиците од кризни ситуации – се наведува во соопштението од Општина Ѓорче Петров.
