Општина Карпош и Градежниот факултет при Универзитетот „Св. Кирил и Методиј“ во Скопје денеска потпишаа Меморандум за соработка, со кој се воспоставува партнерство насочено кон размена на знаења, стручна поддршка и реализација на заеднички проекти.
Меморандумот го потпишаа градоначалникот на Општина Карпош, Сотир Лукровски и деканот на Градежниот факултет, проф. д-р Јосиф Јосифовски.
Како што соопшти Општина Карпош, документот претставува основа за соработка во подготовка на стратешки документи, студии и анализи од областа на градежништвото, геодезијата и геотехничкото инженерство.
Соработката предвидува и активности поврзани со практичната настава и професионалниот развој на студентите, можности за нивно стипендирање, како и поддршка при изработка на научни трудови од интерес за општината.
Од Општина Карпош посочуваат дека преку ова партнерство ја потврдуваат својата заложба за соработка со високообразовните институции и за користење на стручната експертиза во креирањето квалитетни решенија насочени кон подобрување на условите за живот на граѓаните.
