Во просториите на Општина Маврово и Ростуше денеска се одржа првата седница на Локалниот совет за превенција, со која претседаваше градоначалникот Онер Јакупоски, во својство на претседател на советот.
На состанокот учествуваа и претседателите на месните заедници од Долно реканскиот крај, со цел заеднички и координирано да се делува пред почетокот на летната сезона.
-Главна точка на дневниот ред беше деталната анализа на општата безбедносна состојба во регионот. Особено внимание беше посветено на состојбата со пожарите во долно реканскиот дел, како еден од најкритичните ризици во овој период од годината. При тоа беа дискутирани сите потенцијални предизвици со кои локалната заедница може да се соочи за време на претстојната летна сезона, информираше Фикрет Ибраими, одговорен на секторот за односи со јавноста.
Додаде дека со цел зголемување на безбедноста и намалување на сообраќајниот метеж, на седницата беа донесени одлуки за времено регулирање на летниот режим на сообраќај во дел од населените долно рекански села, каде што фреквенцијата на возила е значително зголемена во овој период, кога во родниот крај престојуваат иселениците.
Паралелно со ова, членовите на советот разгледаа и други тековни теми и прашања од директен интерес за секојдневниот живот на локалното население.
Локалниот совет за превенција наредната недела ќе одржи уште еден состанок на истите теми, на кој ќе присуствуваат претседателите на месните заедници од Мавровскиот регион, со што целосно ќе се заокружи планот за безбедно и мирно лето во целата општина.
