Опозицијата се претвори во тажно и несреќно друштво кое конструира лаги и шири хистерија, рече денеска премиерот Христијан Мицкоски, коментирајќи ги реакциите на СДСМ по одлуката на УНЕСКО, Охрид да го задржи статусот на светско културно наследство.
Како што оцени Мицкоски, опозицијата веројатно тажи и зашто државата не банкротира, зашто се уште нема мигранти и зашто на 1 септември сите ученици ќе имаат учебници.
-По робусна, интензивна дипломатска активност, добивме одложување Охрид да биде ставен на листата загрозено светско културно наследство. По три години, во 2029-та, ќе имаме мониторинг мисија, да се оцени што ќе испорачаме, а во 2031 година ќе биде конечниот извештај. Тоа е голем успех за сите добронамерници и за сите граѓани, со исклучок на опозицијата, која тажи зошто тоа се случило. Тие тажат веројатно и зошто не банкротиравме, зошто немаме се уште мигранти, зошто на 1 септември ќе има учебници за сите ученици или кога Скопје ќе ги добие автобусите. Во суштина, опозицијата се претвори во тажно и несреќно друштво кое конструира лаги, шири хистерија и апсолутно ништо не остана од оние државотворни партии кои таму едно време, во минатото, орбитирале. Но, нивно е да тажат, да очајуваат, да бидат несреќни и да коснтруираат невистини и хистерија, а наше е да работиме. На крајот, граѓаните гледаат кој работи и испорачува, истакна Мицкоски, одговорајќи на новинарски прашања по увид во градежните работи на клучката кај Момин Поток.
