– Министерот за правда Јетон Шасивари денеска оствари средба со директорот на Регионалната антикорупциска иницијатива (РАИ), Алберт Хани, на која беше потврдена заедничката определба за продлабочување на соработката во борбата против корупцијата и унапредување на реформските процеси.
На средбата беше истакната важноста од активното учество на Република Северна Македонија во работата на РАИ, како и потребата од понатамошно јакнење на регионалната соработка во спречувањето на корупцијата, соопштија попладнево од Министерството за правда.
– Министерот Шасивари ја потврди поддршката на Министерството за правда за претстојните активности на РАИ, вклучително и Регионалната конференција за проценка на ризици од корупција и проверка на законодавството од аспект на корупцијата за безбедносниот сектор, што ќе се одржи во Скопје, како и своето учество на Министерскиот придружен настан за борба против корупцијата во рамките на Берлинскиот процес во Тирана. На средбата, министерот ја нагласи посветеноста на Министерството за правда на реформите во областа на владеењето на правото, усогласувањето на националното законодавство со европските стандарди и спроведувањето на приоритетите поврзани со Поглавјата 23 и 24 од пристапните преговори со Европската Унија – потенцираа од Министерството за правда.
Како што се истакнува, двете страни ја потврдиле подготвеноста за натамошна соработка преку заеднички иницијативи и проекти за јакнење на институционалните капацитети, интегритетот и доброто владеење.
– На крајот од средбата, директорот Хани уште еднаш му ги упати своите искрени честитки на министерот Шасивари по повод неговото именување и изрази уверување дека реформските процеси ќе продолжат со силно партнерство, меѓусебна доверба и блиска соработка меѓу Министерството за правда и Регионалната антикорупциска иницијатива – се додава во соопштението.
