Со вечерта на корчанските серенади „Спомени од младоста“, во изведба на групата „Кофиел“ синоќа успешно заврши првото издание на Меѓународниот музички фестивал „Чаршија“, иницијатива на Општина Чаир, која четири вечери по ред ја претвори Старата скопска чаршија во сцена на музиката и културата.
На завршната вечер, како што соопштија од Општината, присуствувал градоначалникот на Чаир, Изет Меџити, кој го оценил првото издание на фестивалот како успешен почеток на нова културна традиција и упатил благодарност до уметниците, уметничките директори, организацискиот тим, партнерите и публиката за поддршката и довербата.
-Отсекогаш сум верувал дека едно општество ја добива својата тежина и преку културата што ја создава. Токму со тоа убедување го започнавме овој фестивал, затоа што општество кое инвестира во уметност, инвестира во својата свест, идентитет и достоинство. Првото издание заврши, но сега започнува нашата обврска оваа иницијатива да расте, да се зацврсти и да прерасне во традиција што ќе го позиционира Скопје на културната мапа на регионот – изјавил Меџити.
Во текот на четирите фестивалски вечери, публиката имаше можност да ужива во настапите на реномирани домашни и меѓународни уметници, со што фестивалот ја афирмираше Старата скопска чаршија како значаен простор за културни и уметнички настани.
-Со завршувањето на првото издание, Меѓународниот музички фестивал „Чаршија“ постави темели да прерасне во традиционален културен настан во Скопје – се вели во соопштението.
