Секојдневните напади околу ормускиот теснец продолжуваат трета ноќ по ред. Американските сили извршија напади врз Иран, а иранските пак нападнаа центар за сателитски комуникации во Бахреин како и танкер кој поминувал низ Ормускиот Теснец. Во центарот на вниманието е кој ќе има контрола врз теснецот…Техеран прво изјави дека ќе наплаќа за преминување преку него, а САД одговори со намера за воведување на такса од 20%.
„Ги удираме многу силно. Имавме договор вчера, или завчера, се беше готово и потоа веднаш го раскинаа тој договор бидејќи нешто не им се допаѓаше во него. Тие се различни и нема да го толерираме тоа. Одиме напред, ќе ги нападнеме вечерва. Ќе ги отстраниме сите нивни способности за било што поврзано со Ормускиот Теснец и мислам дека ние ќе го контролираме на крајот целосно“, изјави Доналд Трамп, претседател на САД
Иранскиот министер за надворешни работи Абас Арагчи повтори дека Техеран е чувар на теснецот и дека тоа ќе остане „засекогаш“.
„Стигнавме до договор кој целиот свет го славеше како успех во дипломатијата и потоа САД беа тие кои го повлекоа тој договор и повторно ги поставија нивните санкции и повторно започнаа со нивните закани“, изјави Абас Арагчи, министер за надворешни работи на Иран
Ескалацијата доаѓа после неполн месец од потпишувањето на меморандумот на разбирање помеѓу двете земји кој го стиши светскиот страв за поразорен конфликт и зголемување на цените на нафтата. Но се случува спротивното. Конфликтот ескалира , а цената на суровата нафта „Брент“ скокна на 85 долари за барел, додека американската сурова нафта „Западен Тексас интермедијар“ се приближува кон 80 долари. Проценките на светските аналитичари се очекувани. Сметаат дека секое дополнително нарушување на пловидбата низ Ормускиот Теснец може да предизвика уште посилен раст на цените, бидејќи низ овој морски премин поминува значителен дел од светската трговија со сурова нафта.
