Во Скопје денеска се одржа панел-дискусијата „Европска ЗНАМ, европска иднина, европска Македонија“, со која Движење ЗНАМ – За наша Македонија го започнува планираниот караван низ државата.
Претседателот на партијата, Максим Димитриевски, изјави дека до крајот на јули ќе бидат посетени осум градови, а до крајот на годината активностите ќе опфатат цела држава.
– До крајот на месецот јули ќе посетиме осум градови во државата, а целиот план, стратегија на партијата за отчет пред граѓаните и нивно дополнително информирање за улогата на ЗНАМ во општеството и нашиот учинок во Владата – ќе го реализираме до крајот на годината на територија на целата држава. Имаме намера, под мотото „Европска ЗНАМ, европска иднина, европска Македонија“, да ги посетиме сите градови, сите села, сите населени места, отворено да разговараме со нашите членови, симпатизери, поддржувачи и сите граѓани на Македонија, без разлика на нивната етничка, верска или политичка припадност – рече Димитриевски.
Целта на овој караван е, како што додаде, да бидат присутни помеѓу граѓаните, да ги слушаат нивните сугестии, да ги информираат за нивните активности во ресорните министерства, за активностите на сите нивни – околу педесетина функционери коишто се во редовите на првиот, вториот и третиот ешалон на власта и секако, како што додаде – да добиваат нови идеи и предлози, забелешки, сугестии и критики од граѓаните, сè со цел да бидат поблиску до нив.
- Затоа, денеска тргнуваме овде во Скопје, а веќе утре во Куманово, во исто време – 12:30 часот и во континуитет до крајот на месецот јули. Ќе направиме еден месец пауза во месецот август и потоа повторно ќе продолжиме со нашите активности – појасни Димитриевски, кој одговараше и на новинарски прашања околу најавената реконструкција на Владата.
