Ангела Бошевска, членка на Детско ликовно студио „Св. Кирил и Методиј“ – Битола освои златен медал на светскиот детски ликовен конкурс и изложба, кој се реализира во градот Фуншал, на островот Мадеира во Португалија.
На светската ликовна изложба членовите на ДЛС „Св. Кирил и Методиј“ учествуваа со 20 цртежи и освен златен медал за Бошевска, членовите на студиото Нина Пешевски и Адријан Андреев се наградени со признанието „Избрани дела за изложба“, како единствени претставници од Македонија.
На конкурсот во Мадеира се доделуваат само три награди по категорија, како и признанија за избрани дела за изложба, што го прави предизвикот уште поголем, а успехот уште позначаен, ако се има предвид дека беа оценувани над 5.000 цртежи пристигнати од повеќе од 45 држави, информираа од ДЛС „Св. Кирил и Методиј“ – Битола.
Детскиот ликовен конкурс и изложба во Мадеира беа на тема „Цвеќиња кои се симбол на мојата земја“, а го организираа Регионалниот секретаријат за образование, наука и технологија – Регионалната дирекција за образование и Дирекцијата за уметничко образование во Мадеира, а под покровителство на Министерството за образование, наука и технологија на Португалија.
