Почна асфалтирањето на улицата „Драги Крупишки“, која ги поврзува штипските населби Дузлак и Света Недела. Градоначалникот на општина Штип, Иван Јорданов на денешната прес-конференција рече дека претходно на оваа улица се работеше на промена на старата и несоодветна водоводна мрежа, која со години предизвикуваше чести дефекти и проблеми со водоснабдувањето. По завршувањето на работите со водоводната линија, од денеска започна и асфалтирањето на улицата.
-Сакам да ја известам јавноста за активностите кои се преземаат од страна на општина Штип. Се наоѓаме на улицата ,,Драги Крупишки“, оваа улица ги поврзува населбата Дузлак со населбата Света Недела. Во минатото оваа улица имаше неколкукратен проблем. Пред се, со честите дефекти на водоводната линија, која не соодвестуваше со потребите на жителите од населбата Света Недела, а поради честите дефекти асфалтната маса во минатото беше целосно оштетена. Несоодветна водоводна мрежа се замени со нова, преку Јавното претпријатие „Исар“. Активностите поврзани со водоводната линија за подобрување на притисокот за водоснабдување во населбата Света Недела ќе продолжат и во следните денови за конечно решавање на долгогодишниот проблем кој го имаат овдешните жители-изјави Јорданов.
Тој апелираше до граѓаните да бидат трпеливи, бидејќи се можни прекини со водоснабдувањето.
-Апелирам за трпеливост до граѓаните, затоа што сите активности кои се преземаат се поврзани со водоводни линија, потребата од реконструкција налага и прекин во одредени зони во водоснабдувањето. Но верувам дека сите активности по завршувањето ќе донесат благодат на сите граѓани затоа што со реконструкциите долгорочно го решаваме кој сме го наследиле-вели Јорданов.
