Собраниската Комисија за финансирање и буџет во денешното продолжение на седницата досега не прифати ниеден од предложените амандмани на предлог-ребалансот на буџетот.
Отфрлени беа неколку амандмани на ДУИ со кои се бараа дополнителни финансиски средства за инфраструктурни проекти во повеќе населени места, како и за изградба на жичница од Тетово до Попова Шапка.
Како што објасни заменик-министерот за финансии, Николче Јанкуловски, средствата за инфраструктурните проекти се веќе предвиени и обезбедени преку повеќе програми, како онаа за рамномерен регионален развој, како и преку буџетите на министерствата.
Членовите на Комисијата од владејачкото мнозинство укажаа дека ДУИ додека беше на власт, имаше можност да реализира повеќе инфраструктурни проекти за кои сега бара пари, но тоа не го стори.
Лидија Петкоска од ВМРО-ДПМНЕ се осврна на амандманот за жичницата.
– Не зборуваме дали ова е добра идеја, туку дали амандманот е реален и солидно подготвен зашто секој денар треба да биде поткрепен со проект. Ова не е првпат да слушаме големи ветувања за Попова Шапка. Последното беше кога ДУИ, како дел од власта, најави проект од 168 милиони евра за ски-центар. Сè звучеше одлично, но инвестицијата не се реализира. Ние сакаме проект што ќе се изгради, а не само да даваме ветувања. Дали постои готов основен проект за жичницата, ревидирана техничка документација, оебзедена градежна дозвола, тендерска документација..? Ако одговорот на едно од овие прашања е „не“, тогаш парите што ги барате нема да изградат ниеден столб од жичницата – потенцира Петкоска.
Муса Џафери од ДУИ оцени дека има дискриминација и максимална централизација кога станува збор за распредлбата на државниот буџет.
Во тек е расправата за амандманот на Левицата за изградба на социјални станови.
За ребалансот на буџетот се поднесени 224 амандмани: 90 од ДУИ, 78 од СДСМ, 51 од Левицата и пет од „Вреди“.
