Под мотото „Отворив очиња – видов ден, синоќа во Велес за првпат се одржа дефилето на бебиња во колички, нивните мајки и трудници, во организација на ЈЗУ Општа болница Велес. Настанот беше инициран од здравствените работници од Гинеколошко-акушерското одделение, со поддршка од Општина Велес.
Дефилето симболично го претстави патувањето од бременоста, преку породувањето, до првата прегратка и првите моменти на родителството. По прошетката низ градот, учесниците се собраа во Младинскиот парк, каде што се дружеа здравствените работници и младите семејства кои во изминатите две години учествувале во програмата „Подготовка за раѓање“, што успешно се реализира во рамки на Гинеколошко-акушерското одделение.
Настанот беше збогатен со музичка програма, детска анимација, фотографирање и бројни изненадувања за најмладите и нивните семејства.
Пред присутните се обрати иницијаторот на настанот, медицинската сестра Видосава Тончова, која истакна дека идејата произлегла од долгогодишното професионално искуство на неа и нејзините колешки од Гинеколошко-акушерското одделение.
-Нашата работа не е само професионална обврска, туку и привилегија да бидеме дел од моментите кога започнуваат нови животни приказни на семејствата. Веруваме дека секоја насмевка, секој убав спомен и секое семејство понесе дел од атмосферата на овој ден, а што ќе биде потврда дека заедно сме создале нешто вредно и трајно за нашата локална заедница- потенцира Тончова.
Таа додаде дека токму желбата овие незаборавни моменти да бидат одбележани и споделени со пошироката јавност ја родила иницијативата „Отворив очиња – видов ден“, чија цел е да ја слави убавината на родителството, љубовта и новиот живот, но и да прерасне во нова велешка традиција што ќе ги обединува семејствата и здравствените работници.
Организаторите најавија дека манифестацијата ќе се одржува традиционално секоја година на 28 јуни – празникот Видовден.
Од Гинеколошко-акушерското одделение при ЈЗУ Општа болница Велес ги информираа присутните дека годинава одделението е опремено со нова медицинска и друга современа опрема, со што значително се подобрени условите за престој на родилките и нивните новороденчиња. Воедно, тие упатија повик до сегашните и идните трудници од Велес и поширокиот регион своето породување да го изберат токму во велешката болница, нагласувајќи дека за мајките и бебињата се грижи искусен и стручен тим од акушерки, медицински сестри и лекари.
