И покрај неизвесноста на светските пазари, растот на цените на нафтата и геополитичките тензии, Владата уверува дека економската состојба во Македонија останува стабилна и дека навремено се преземаат мерки. Премиерот Христијан Мицкоски најави дека ќе биде продолжена кризната состојба, а ќе биде донесена и одлука за намалување на акцизите за бензинот и дизелот.
„Денеска, на вонредна владина седница, ќе ја продолжиме кризната состојба и во рамките на оваа кризна состојба ќе ги намалиме акцизите за безоловните бензини и за дизел-горивата, со што колку-толку ќе влијаеме позитивно за граѓаните, а негативно за цената, бидејќи таа ќе се намали. Очекувам да продолжиме и понатаму да бидеме со убедливо најниска цена на бензините и на дизел-горивата“, изјави премиерот Христијан Мицкоски.
Според Мицкоски, и покрај економските предизвици, домашната економија покажува позитивни резултати. Се очекува солиден економски раст и во вториот квартал од годината, преку силен раст во градежништвото, трговијата и туризмот. Премиерот посочи и дека буџетските приходи се над планираното, што овозможува редовна исплата на сите обврски.
„Очекувам и во вториот квартал да имаме солиден раст на бруто-домашниот производ имајќи предвид дека во април градежништвото беше над 40 %, трговијата исто така е двоцифрена, имаме раст во туризмот, буквално во сите сегменти. И покрај, би рекол, предизвикувачката состојба, ќе биде тешко, но нема да очајуваме, ќе се бориме“.
Воедно Мицкоски порача дека нема простор за стравување од економски колапс, нагласувајќи дека платите и пензиите ќе продолжат да растат согласно законските решенија. Најави и засилена реализација на капиталните инвестииции, при што во наредниот период се очекува изградба на шест автопати, како и почеток на изградбата на брзата пруга долж Коридорот 10. Целта на овие мерки е да се зачува економската стабилност и да се заштити животниот стандард на граѓаните.
