Народот го кажа своето мислење – ниту мислат дека Македонија се движи во добра насока, ниту веруваат дека премиерот ќе ја подобри економската слика во државата, ниту пак имаат надеж дека нешто ќе се промени наскоро. Накратко ова се резултатите од вториот дел од анкетата на МКД.мк.
Резултатите покажуваат дека само 10 проценти од испитаниците сметаат оти земјата се движи во позитивна насока, “стои во место” одговориле 24 проценти, не знам 3,8, додека пак негативно мислење дале дури 62,3 отсто.
На прашањето Дали очекувате во наредните 6 месеци вашиот животен стандард да се подобри позитивно одговориле само 20,3 отсто, да остане ист одговориле без малку половина односно 43,4, а да се влоши 36,4 проценти од испитаниците.
Дека Ковачевски пред да му заврши мандатот економски ќе ја оправи Македонија, испитаниците речиси и да не веруваат. Негативно се изјасниле 67,8 проценти, позитивно 19,3, а не знам одговориле 13 проценти.
Како главен проблем во Македонија, анкетата покажува дека се’уште рак рана на општеството е корупцијата и нефункционалноста на системот. А и криминалот кој цвета цврсто го држи првото место.
„Нефункционирање на правниот систем/криминал и корупција – 21,4 %
Намалена стопанска активност – 19,5 %
Невработеност – 12,5 %
Инфлација – 11,5 %
Зголемување на цените на струјата и нафтените деривати – 7,1 % “
Проблемите со блокадите со Бугарија, одлговлекувањето на почеток на преговорите за влез во Унијата, како и низата на нови уцени кои ги трпи Македонија за да стане член на европското семејство, се повеќе го зголемуваат евроскептицизмот во државата.
„Дали верувате дека Македонија ќе стане членка на ЕУ?
Не – 55,7 %
Да – 33, 8 %
Не знам – 10,6 проценти “
Позитивен став во врска со уставните измени за запишување на Бугарите во Уставот имаат 20% од испитаниците, додека негативен став имаат приближно половина или 48,7%. Од сите оние испитаници кои немаат позитивен став, 42% би поддржале уставни измени доколку ЕУ даде цврсти гаранции за зачувување на македонскиот јазик и идентитет.
За политичкото мерење на силите на партиите, во првиот дел од анкетата беше објавено дека доколку утре се одржат парламентарни избори за ВМРО-ДПМНЕ има убедлива предност пред другите политички партии односно 21,8 проценти, а лидерот на партијата Мицкоски ужива и најголема доверба кај граѓаните, неговиот рејтинг е 11 проценти, додека на премиерот Ковачевски му 8,2 отсто. Трет е Али Ахмети со 5,1 , Димитар Апасиев пак ужива доверба кај четири проценти од граѓаните.
Анкетата е споведена телефонски од Маркет вижн за потребите на МКД.мк на 1200 испитаници во периодот од 6 до 16 февруари.
Мери Симоновска
