Интензивно се асфлатира новиот дел од булеварот „Партизанска“. Градежните машини работат на потегот од новиот кружен тек кај зградата на Авто мото друштвото до крстосницата кај Макара. Градоначалникот на Општина Штип, Иван Јорданов вели дека со асфалтирање и на овој потег, каде што имаше застој во изградбата поради уривањето на објект, новиот дел на булеварот „Партизанска“ ќе биде пуштен целосно за сообраќај.
-Со асфалтирање се завршува денеска, со што населбата Осми Ноември се поврзува со населбата Баби. Овој булевар беше сон на многу штипјани, за да се продолжи и да се поврзе со населбата Баби и еве со денешното асфалтирање конечно сите активности ќе бидат финализирани. Деновиве ќе бидат поставени и нови канделабри за осветлување, сигнализацијата ќе биде поставена и со тоа го завршуваме проект, кој додава вредност во нашиот град. Затоа што освен булеварот „Партизанска“ следно што ќе се одвива на овој потег е уривањето на некогашното Нервно одделение, една болна тема и барање на жителите, изјави Јорданов.
Тој потенцира дека пред да се урнат објектите во старото Неврно одделение, ромските семејства кои со години живееја во нив, наредната недела ќе бидат преселени во новите типски куќи во населбата Света Недела.
-Објектите во Неврното одделение беа привремен дом на десетина ромски семејства. Морам да потенцираме дека проектот за типски куќи е веќе завршен. Деновиве се поврзува подземната инфраструктура и во текот на следната недела ромските семејства ќе бидат преселени во типските објекти, вели Јорданов.
Локацијата на старото Нервно одделение ќе биде зона за домување, односно ќе се градат нови станбени згради, спроти нив се гради и супермаркетот „Лидл“, а покрај пешачката патека се гради и голем парк, со најразлични содржини, со што овој дел од градот забрзано ќе се модернизира.
Јорданов најави дека по доизградбата на булеварот „Партизанска“, општината продолжува и со доизградбата на булеварот „Гоце Делчев“ од кружниот тек кај Лукоил до приградската населба Три Чешми, со што влезот и излезот на градот Штип кон Скопје ќе добие модерен и современ изглед.
