Во Домот на културата „Кочо Рацин“ во Скопје денеска ќе се одржи деветото издание на завршната манифестација на Деветтиот фестивал на поезија за деца „Стихувалки 2026“.
Основната цел на Фестивалот е поттикнување на книжевното творештво за деца и поддршка на авторите кои создаваат поезија наменета за најмладите.
На распишаниот конкурс од организаторот пристигнале поетски творби од околу 150 афирмирани и неафирмирани автори од Македонија и од соседните држави.
По избор на жири-комисијата, 84 автори се застапени со свои песни во заедничка збирка „СТИХУВАЛКИ 2026“, со што фестивалот продолжува да открива нови авторски имиња и нови книжевни вредности во литературата за деца. Објавените песни континуирано беа претставувани на фејсбук страницата „Стихувалки – поетски фестивал“, каде и публиката имаше можност да гласа за своите фаворити.
На свеченоста ќе биде промовирана збирката „Стихувалки 2026“ и ќе им бидат врачени признанија на сите 84 застапени автори, а секој автор ќе добие бесплатно и примерок од збирката. Ќе бидат доделени и благодарници за сите учесници, подржувачи и соработници.
Ќе бидат соопштени традиционалните награди за трите најдобри песни – златна, сребрена и бронзена плакета, како и две специјални награди: за најдобра песна од странски автор и специјалната награда за песна што добила најголема поддршка од публиката. Сите наградени автори ќе добијат и пригодни подароци од организаторот и поддржувачите.
Носител и организатор на проектот е издавачката куќа ЕДУКА МАК – Скопје, а автор и програмски уредник на проектот е писателката м-р Ели Маказлиева. Промотори на збирката ќе бидат членовите на Жири – комисијата: проф.д-р Елизабета Бандиловска и проф.Лила Арсова. Свеченоста ќе биде збогатена со музички точки.
