Заменик-министерот за економија и труд, Марјан Ристески заедно со градоначалникот на Македонски Брод, Жарко Ристески ја посетија компанијата Асинус во оваа општина, која се бави со производство, откуп и преработка на овошје, шумски плодови и печурки, и во континуитет вложува во модернизација и приширување на производните капацитети.
Во изминативе неколку години, информираат од Министерството за економија и труд, компанијата има инвестирано во ладилни комори со био турбо (Bio Turbo) системи кои го отстрануваат гасот етилен и го продолжуваат рокот на траење на овошјето, воведен е процес на лиофилизација (freeze drying) со што се овозможува зачувување на 98 отсто од хранливите состојки на овошјето без хемиски додатоци, а основана е и сопствена лабораторија за нутритивна анализа и верификација на квалитетот.
-Оваа компанија е успешен пример и приказна за компанија која расте и се развива преку континуирани инвестиции во модернизација на производствените капацитети и нови технологии. Министерството за економија и труд им стои на располагање на македонските компании, каде нудиме голем број на мерки за финансиска поддршка преку јавните повици од програмите за работа на министерството, како и преку мерките наменети за раст на компаниите во рамки на Оперативниот план за активните програми и мерки за вработување и услуги на пазарот на трудот, кажа заменик-министерот Ристески.
