За 20% повеќе годинава е зголемен бројот на студенти кои се запишале во првиот уписен рок на УГД. Периодот за поднесување на приговори заврши и од денеска па до среда, бруцошите ќе може да се пријавуваат за индекс, по што ќе се знае и конечниот број на студенти кои се запишале во првиот уписен рок. И годинава најголем беше интересот за студиските програми по Општа и Дентална медицана.
„Од вкупните бројки до сега, од она што се пријавиле во нашиот систем, може да кажам дека имаме повеќе од 1000 апликации. Споредбено со минатата година тоа е повеќе од 20% пријавени кандидати. Ние сме задоволни и на вториот и трет уписен рок очекуваме да имаме зголемување на бројот на студентите„ изјави проректоротот на УГД, проф.Мишко Џидров.
Во меѓувреме странските студенти кои сакаат да студират на УГД, се во процес на нострификација во Министерството за образование. Тие ќе може да аплицираат во вториот и третиот уписен рок. И годинава има интерес. Освен од Турција, интерес за студирање во Штип, покажале и млади луѓе од Европа. Пред да се запишат, мора да пологат испит по македонски јазик.
„Ние имаме подготвителна настава за странските студенти. Изучуваат македонски јазик една година и потоа полагаат. По полагањето може да се запишат и на една од студиските програми кои се на македонски јазик. За нив нудиме и студиски програми на англиски јазик. Имаме квоти, ако се запишуваат на студиските програми на македонски тогаш се рангираат со македонските студенти, ако се запишуваат како странци, тоа се дополнителни квоти„ изјави проректорот на УГД, проф.Мишко Џидров.
Вториот уписен рок на УГД, ќе биде на 4 и 5 септември, а третиот на 17 и 18септември.
