Компанијата „ОДВ Електрик“ како општествено-одговорна компанија донираше десет персонални компјутери за потребите на учениците во Општинскиот електро-машински училишен центар „Св. Наум Охридски“ во Охрид.
Од средното училиште посочуваат дека донацијата претставува современ технички ресурс што директно ќе влијае врз подобрување на знаењата, вештините и можностите на учениците од Центарот.
„Поддршката што ни ја дава ОДВ Електрик претставува, исто така, значаен придонес за унапредување на нашата работа и создавање подобри услови за учење и развој на учениците“, велат од училиштето, притоа посочувајќи дека хуманоста и општествената одговорност се пример што инспирира.
Компанијата „ОДВ Електрик“ и претходно има донирано опрема, согласно потребите на училиштето во насока на подобрување на образовниот процес, во рамки на повеќегодишната соработка со училиштето во делот на дуалното образование.
