Реконструкцијата на музичкото училиште „Панче Пешев“ во Куманово е во завршна фаза, соопшти денеска кумановскиот градоначалник Максим Димитриевски. Градежните активности опфатија реконструкција на покривот, поставување нова енергетско-ефикасна фасада, замена на прозорците со нови ПВЦ прозорци и поставување нова влезна врата. Предвидени се и внатрешно варосување и поставување нов хидрантски систем.
Реконструкцијата е дел од проектот „Справување со загадувањето на воздухот“, финансиран од Кралството Шведска и Општина Куманово, а имплементиран од УНДП, со фокус на подобрување на квалитетот на воздухот и унапредување на енергетската ефикасност.
Работите започнаа во мај годинава, а поради реконструкцијата учениците, со одлука на Советот на Општина Куманово, наставата ја следат во просториите на ООУ „Вук Караџиќ“. Објектот на музичкото училиште добива нов изглед и подобри услови за работа и престој на учениците и наставниот кадар. Училиштето целосно се реконструира за првпат од неговата изградба во 1946 година.
