Убеден сум дека овој простор ќе стане нов дом на џезот во Скопје, порача Министерот за култура Зоран Љутков од просториите каде ќе биде сместен Националниот џез оркестар. Станува збор за современ и функционален објект кој треба да обезбеди достоинствени услови за работа на музичарите и да стане нов центар на културата во Скопје. Првата фаза на реновирање веќе е завршена и опфаќа инфраструктурни работи и инсталации. Во тек е и втората фаза, која треба да го даде конечниот изглед на просторот, а рокот за изведба е 90 дена.
„Направени се оние погрубите работи во овој простор. Во втората фаза се одобрени некаде околу 7,5 милиони денари со кои ќе биде завршен конечниот изглед и на канцеларискиот простор, собите за вежбање и на салата што е во склп на овој простор. И конечно рок на изведба изведувачот има 90 дена ”, изјави Зоран Љутков, Министер за култура
Националната установа џес оркестар оваа година од државата доби 9 милиони денари за програмски активности. Новиот простор ќе зафаќа околу 500 квадратни метри и ќе содржи голема сала за проби, тонско студио, административни канцеларии и помошни простории.
„Бескрајно сме благодарни на поддршката на раководството кој што ни излегоа во пресрет овие години за можноста да ги реализираме нашите концерти и нашата програма. Ова ќе биде суперолеснителна околност за во иднина да би реализирале уште подобри проекти и програма ”, изјави Гоце Стевковски, директор на Национален џез оркестар
Основниот проект за реновирање и уредување на овие простории кај Националната опера и балет е изработен уште во 2023 година. До крајот на годината, уште шест до седум институции од областа на културата, кои се во фаза на изградба, ќе бидат завршени.