Почна пробивањето на нова улица, која ќе ги поврзува улиците „Мирче Ацев“ и „Тодор Колораров“ кои водат до новата зграда на Клиничка болница и средното медицинско училиште „Јане Сандански“ во Штип. Градоначалникот на општина Штип, Иван Јорданов на денешната прес-конференција рече дека станува збор за нова поширока улица. Потребата од нејзината изградба е поради големата фреквенција на возила околу штипската Клиничка болница.
– Ова е едно комплетно нова траса, која верувам ќе го намали постоечкиот сообраќаен метеж на овие улици и ќе овозможи побрз пристап до средното медицинско училиште и до новата Клиничка болница, а имајќи предвид дека проектот на Владата на Република Македонија е во непосредна близина до средното медицинско училиште и до зградата на новата Клиничка болница да има Студентски дом и Факултет за медицински науки верувам дека оваа траса и оваа сообраќајница перспективно ќе биде користена и ќе користи за пристапноста на сите објекти – изјави Јорданов.
Тој додаде дека оваа инвестиција чини 15 милиони денари. Јорданов потенцираше дека Општината паралелно работи и на нови инфраструктурни проекти, меѓу кои е и новата обиколница од населбите Железничка и Пребег кон Мерите и викенд населбата Плуждино, а на оваа траса ќе има и нов мост на реката Брегалница. Нова обиколница со нов мост на река Брегалница е предвидено да се изгради и меѓу штипските населби Баби и Балканска.
– Ова се капитални проекти, кои што верувам дека Штип ќе го променат визуелно и функционално. Посакувам динамиката на градба да биде забрзана, за час побрзо овие проекти да се стават во функција – рече Јорданов.
