Еден од четворицата пациенти ранети пред два дена во масовното убиство во Цетиње сè уште е во критична состојба, со неизвесен исход, соопштија од Клиничкиот центар на Црна Гора.
Вчера вечерта, граѓаните на Цетиње и во други градови ширум Црна Гора палеа свеќи и им оддаваа почит на дванаесеттемина загинати во трагедијата. Собир имаше и на плоштадот на Независноста во Подгорица, каде што неколку стотици граѓани се собраа да изразат солидарност со семејствата на жртвите. Претседателот на Црна Гора, Јаков Милатовиќ, заедно со сопругата Милена, исто така запали свеќа во чест на загинатите. Во центарот на Подгорица беше отворена и книга на жалост, во која граѓаните се потпишуваа.
Слични собири беа организирани во Никшиќ, Плевља, Бијело Поле, Херцег Нови и други градови низ земјата.
Според полицијата, осомничениот за масакрот, Ацо Мартиновиќ, се обидел да се самоубие по покренатата потера по него. Тој починал на пат кон болница. На полноќна прес-конференција, министерот за внатрешни работи на Црна Гора, Данило Сарановиќ, изјави дека мотивот за убиствата сè уште е непознат.
Жртвите, меѓу кои и две деца на возраст од 10 и 13 години, биле убиени на пет различни локации.
