Националната установа Центар за култура, на прес – конференција го промовира новото, 18-то издание на меѓународниот фестивал „Музика од светот“.
Годинава во Битола ќе гостуваат и настапат, уметници од Грузија, Босна и Херцеговина, Шпанија, Турција и од Македонија, најави Сашо Илковски, директор на установата.
-Фестивалот „Музика од светот“ ќе ја претвори Битола во вистински музички крстопат каде ќе се реализира средба на различни култури и традиции низ современ музички израз. Музиката не познава граници, јазици и бариери, наоротив, таа претставува универзален јазик што ги претставува луѓето уметници од повеќе европски земји – истакна директорот Илковски.
Фестивалската програма ќе почне на 25 ноември со настап на Амира Медуњанин од Босна и Херцеговина, една од најпрепознатливите интерпретаторки на балканската музика, избор на селекторот Благојче Трајковски.
-За изборот на програмата конкурираа многу артисти од Европа и имаме комбинација која може да се сврсти и за следната година. Секој гостин има своја приказна и повод, а публиката ќе може да чуе многу новини низ осум програмски настани. Фестивалот „Музика од светот“ е сериозно збиднување во балканскиов простор и дава голем придонес во развојот на културата и уметноста – нагласи селекторот Трајковски.
За време на фестивалот „Музика од светот“ освен музичка програма, ќе се реализира и придружна програма која содржи две изложби, првата „Музика во слика и слика во музика“ чиј автор е Жаклина Николовска, а втората изложба е на тема „Бучава што создава идентитет“ од авторот Тошо Филиповски.
