Уште на стартот на годината ВМРО-ДПМНЕ почнува со подготовки за успешен настап на локалните избори во октомври. Општинските комитети веќе испратиле предлог имиња со кои ВМРО-ДПМНЕ треба да се бори за градоначалничките места. Внатрепартсиката дебата е во тек, а месецов ќе започнат и мерењата на рејтинзите на можните кандидати, соопшти премиерот Христијан Мицкоски. Најголемиот број од имињата би требало да бидат познати пред летото.
-Во моментот е во тек внатрепартиската дебата, веќе од страна на општинските комитети се пристигнати предлози имиња кои што треба да се најдат на анкетите, на мерењата. Започнуваме во втората половина од јануари да мериме интензивно и очекувам таму некаде втората половина на мај месец би рекол 85, 90 проценти од имињата ги соопштиме на македонските граѓани, изјави Мицкоски.
Додека најголемата владејачка партија се подготвува за настап на локалните избори, опозицијата бара смени на владини функционери. Во петок Собранието ќе почне расправата за интерпелации поднесени од ДУИ за вицепремиерот и министер за животна средина Изет Меџити, вицепремиерот и министер за односи меѓу заедниците Иван Стоиљковиќ, министерот за внатрешни работи Панче Тошковски, неговиот заменик Астрит Исени и претседателката на собраниската Комисија за социјална политика, демографија и млади Илире Даути.
Мицкоски вели очекувал вакво нешто од опозицијата, која наместо да се реформира, се обидувала неосновано да ја напаѓа власта.
-Очекувам од страна на опозицијата напади кои што ќе поларизираат, очекувам да поттикнат чувства на меѓуетничка нетолеранција, но мислам дека тоа ќе биде јалово и неуспешно и ќе заврши овој обид како неуспешен обид. Очекувам критики кои што ќе бидат неосновани и кои што немаат никаква врска со реалноста. Но, добро таква ни е опозицијата во овој момент. 09:59
Собранискиот спикер Африм Гаши претходно кажа дека секоја интерпелација ќе се дискутира во текот на целиот ден во зависност од пријавените пратеници за збор, но сепак на крајот на денот ќе мора да се гласа.
Матеја Петровски
