Опозициската ВМРО-ДПМНЕ со нова реакција кон министерот Оливер Спасовски за пропустите во врска со грозоморните убиства, кои страшно ја вознемирија јавноста но и регионот. Во најновото партиско соопштение се навраќаат на ветувањата кои Спасовски како прв човек на полицијата ги даде во јавноста, и колку тие држат вода гледајќи низ годините откако седна на министерското столче.
„Полицаецот позорникар ќе биде нашиот пријател – заштитник во секое време е ставот на Министерството за внатрешни работи кое после две децении ги враќа полицајците на улица, како заштитници на бебедноста и спокојот на граѓаните, кажа Спасовски пред 5 години, од тогаш до сега десетина убиства, грабнувања и илјадници други кривични дела се случија, и ретко кое е расчистено. На Спасовски кој се фалеше како успешно го вратил полицаецот позорникар, му се случи грабнување и убиство на дете во центарот на Скопје. Криминална група харала десетина дена низ Скопје и Македонија, првин е убиен велешанецот Панче, а потоа младата Вања. Помеѓу двете убиства има неколку дена, и двете убиства се направени од истите луѓе. Главниот осомничен е во бегство, затоа што МВР на Спасовски не реагира навреме“, обвинуваат од партијата и додаваат дека Спасовски должи одговори на многу прашања.
„Како е можно во центарот на Скопје да се киднапира дете, а полицијата една недела да не знае ништо? Дали Спасовски дозволил бегство на Палевски зошто истиот е поранешен претседател на градската организација на СДС? Како е возможно со автомобилот на претходно убиенот велешенец бандата да се развозува низ цело Скопје и да остане незабележан од полицијата? Дали вистинската причина зошто се дозволи Палевски да избега е зафатеноста на полицијата со Самитот на ОБСЕ? – се дел од прашањата наведени во соопштението на ВМРО-ДПМНЕ.
