Да се коментираат иницијативи и одлуки на Уставен суд на туѓа држава е поминување на сите граници на пристојно однесување и такви изјави, посебно во домот на демократијата се крајно непожелни. Експертите се децидни дека ниту една држава не смее да се меша во внатрешните работи на Македонија. Овие остри реакции доаѓаат по скандалозната прес конференција на претседателката на албанското Собрание која од македонскиот Парламент ги истакна очекувањата од одлуките на судот за балансерот и за законот за јазици.
Вчерашната изјава на Спиропали е јавна презентација на политиката на владата на Еди Рама која ја води кон Македонија. Оценката зошто таа сметала дека тоа треба да се каже јавно, во Собранието на Македонија, тоа е веќе друго прашање. Би било добро да се испрати вербална нота до амбасадорот, бидејќи таа ги помина сите граници на пристојно однесување и давање на такви изјави во Собранието се крајно непожелни и тоа не доликува, вели поранешниот амбасадор Јован Донев.
Ова не е ништо друго освен политички маркетинг и една дополнителна инфузија за Али Ахмети, сметаат упатените. Со оглед на тоа што Спиропали доаѓа од партија која е сестринска на ДУИ и СДСМ, очекувано е да се бори за политички поени на контото на опозицијата.
Албанија никогаш немала кој знае колкав интерес за правата на Албанците тука, нејзините коментари околу можноста за укинување на балансерот и за Законот за јазици е политички маркетинг во сметката на Али Ахмети. И кога се случи тиранската платформа беше со цел да го спасат Ахмети да не оди во опозиција. Сега имаше битка помеѓу два табора во Македонија и два табора надвор, Вреди и Европски фронт и кршење на копјата на Курти и Рама. Нејзината изјава беше да му даде една дополнителна инфузија на Али Ахмети. Може да се спречи (мешањето од други земји) ако имаме правна држава и ако функционираат Уставот и законите, вели политичкиот аналитичар Љуљзим Фаризи.
Освен службената посета на нејзиниот македонски колега Гаши, Спиропали се сретнa со лидерот на ДУИ, кој и се пожалил за состојбата со меѓуетничките односи, и со лидерот на СДСМ, Венко Филипче.
Спиропали порача дека албанскиот јазик е светост и со секое негово кршење се нарушувал идентитетот на Албанците. Во контекст на ова, рече дека целосно ја разбирале загриженоста на албанскиот фактор од можни промени, во зависност од очекуваната одлука на Уставниот суд. Што се однесува до одлуките на судот, индиректно ја отвори и темата за балансерот кога рече: Сигурна сум дека правичната и пропорционалната застапеност на Албанците во институциите на земјата ќе продолжи согласно современите демократски стандарди на мултиетничкото општество.
