Дизелот поскапува за 2 и пол денари по литар, 95-ката поевтинува за половина денар, а 98-цата останува со иста цена. Регулаторната комисија за енергетика објави нови цени со важност од полноќ. Тоа значи дека дизелот од утре ќе се продава по цена од 98 денари за литар. Бензинот од 95 октани ќе чини 83,5 денари по литар. 98-цата има иста цена од 85,5 денари по литар. Од овие цени може да се оди и до 2 до 3 денари поевтино поради дадениот попуст на ОКТА. Инаку, Екстралесното масло за домаќинства поскапува за 3 денари, и ќе се продава за 95,5 денари по литар.
ЦЕНИ НА НАФТЕНИ ДЕРИВАТИ 07.06.2026
ЕУРОСУПЕР 95 83,50 (денари/литар)
ЕУРОСУПЕР 98 85,50 (денари/литар)
ЕУРОДИЗЕЛ 98,00 (денари/литар)
Екстра лесно масло 95,50 (денари/литар)
Мазут 51,311 (денари/килограм)
Владините мерки придонесоа за ублажување на ценовниот удар. Премиерот Мицкоски вели дека било спречено цената на дизелот да надмине 100 денари по литар, а бензините на некои пумпи очекува да се продаваат поевтино. Ова доаѓа откако вчера Владата излезе со нова мерка за намалување на акцизите од 4 денари кај дизелот и 2 денари кај горивата. Дополнително, до крајот на април ќе важи попустот од ОКТА кон трговците од 3 денари за дизел и 2 денари за безоловен бензин. ДДВ и натаму останува намалено на 10 наместо на 18% до крајот на месецов.
„Од аспект на количини сме стабилни. Зголемена е потрошувачката од 1,5 милиони литри на 2 милиони литри на ден. Имаме притисок од пограничните места. Ја продолживме мерката од 18 до 10 проценти ДДВ, се со цел да го заштитиме стандардот на граѓаните и бизнисот“ – вели Христијан Мицкоски – претседател на Влада.
Поради вонредните мерки за задржување на стандардот на граѓаните, буџетот трпи загуби што се мерат во милион евра дневно – дециден е премиерот. Тој објасни дека го имаат предвид буџетот од една страна и тешката ситуација предизвикана од глобалните случувања. Вели дека државната каса трпи притисок поради големите долгови за враќање направени пред неколку години. Активно се анализираат мерки и за стабилизирање на цените на прехранбените производи.
Инаку поради скокот на цените на нафтата на светските берзи и поскапувањата што следеа, Владата очекува инфлацијата во март да изнесува помеѓу 4,5 и 5%. Претходно, во февруари инфлацијата се стабилизираше на 2,9%. Засега проекциите за нивото на инфлација, раст и дефицит остануваат исти.
