Случувањата во коалицијата Вреди не удираат врз цврстите темели на владината коалиција. Владата е сигурна – порачуваат сите партнери од мнозинството. И покрај кавгите меѓу лидероте на „Вреди“ и Алијанса за Албанците на Арбен Таравари, на централно ниво се функционира нормалн, велат од ВМРО-ДПМНЕ.
-Треба со ладна глава да се носат одлуки во вакви моменти. Владата е стабилна, има стабилно мнозинство, велат од ВМРО-ДПМНЕ.
По одлуката да го раскинат партнерството со Таравари, од Вреди за Алфа велат дека станува збор за несогласувања само внатре во коалицијата, додека во Собранието и Владата сите делуваат заедно како партнери.
-Вреди е се уште заедничка коалиција во Владата и во Собранието. За тоа како ќе функционираме понатаму секако јавноста ќе биде информирана на време, велат од Вреди.
Градоначалникот на Тетово и прв човек на Беса, Билал Касами, очекува пак уште повеќе да се прошири владиното мнозинство.
-Од друга страна веќе има понуди и барања разговори со други политички фактори во делот на опозицијата кои се подготвени да бидат дел од владиното мнозинство, така да ценам дека оваа ситуација нема да ја разниша и Владата, напротив, владиното мнозинство ќе биде уште поголемо, изјави Касами.
Дека владината коалиција е сигурна велат и од ЗНАМ на Максим Димитриевски. Од таму порачуваат дека случувањата во „Вреди“ се нивно внатрешно прашање, и дека проблеми на централно ниво нема. Додаваат дека дури и некој да реши да го напушти владиното мнозинство, владата останува стабилна затоа што само со ЗНАМ и ВМРО-ДПМНЕ таа има подршка од 64 пратеници.
-За Движењето ЗНАМ, превирањата во ВРЕДИ не се закана за владејачкото мнозинство. Во моментов владината коалиција функционира тековно и без никакви застои. Владата е стабилна со самиот факт што ЗНАМ и коалицијата на ВМРО-ДПМНЕ обезбедуваат мнозинство од 64 пратеници и дополнително пратениците во коалицијата Вреди кои ја поддржуваат владата, изјави портпаролот на ЗНАМ, Никола Мемов.
Алијанса на Таравари денеска немаше никаков коментар за случувањата и дали е можно проблемите во Вреди да се пресликаат во Владата. Сепак, во своите претходни излагања, министерот за здравство неколку пати порача дека не очекува проблемите да имаат влијание врз партнерството во Владата. Во моментов владината коалиција има поддршка од вкупно 78 пратеници во Собранието, па и евентуално и некој да ја реши да го напушти мнозинството, тоа не би имало никакво влијание врз стабилноста на Владата предводена од Христијан Мицкоски.
Матеја Петровски