Прво кампања па примена на Законот против пушењето. Властите согласни да ги разгледаат барањата на угостителите за пробен период додека официјално се донесе законот за пушење. Следната недела министерот за економија за здравство и газдите на угостителските објекти ќе седнат на маса и ќе ги разгледаат сите предлози, па ќе донесат одлука дали законот ќе почне да се приленува од 1 ви март или ќе има одложување.
„Они побараа од нас да имаме временски период додека да се стави на сила законот. Значи да одиме прво со кампања па потоа да одиме со информација додека да стапи на сила законот да бидат на некој начин и они спремни и потоа да стапи законот на сила. Од тоа што беше разгледано од нивната страна, добив информации од секретарот дека ќе имаме уште еден состанок каде што ќе присуствувам и јас заедно со министерот за здравство и ќе ги разгледаме можностите. Нашата цел е јавното здравство да го сочуваме и да се грижиме. Тоа ќе го кажеме и на идниот состанок и ќе донесеме една одука која ќе биде прифатлива од сите засегнати страни.“– вели министерот за економија итруд, Бесар Дурмиши.
Позитивните ефекти од законот за пушење ги потврдија и пулмолозите.
„Она што е пострашно е што сè повеќе во мода се електронските цигари. Иако има пропаганда дека тие воопшто не се штетни, напротив, тие се штетни и даваат долготрајни и тешки последици за нежните бели дробови на децата. Даваме поддршка затоа што ова не е казна, туку сакаме директно да ги заштитиме како помладите така и возрасните луѓе бидејќи една од основните причини за појава на белодробен карционом е никотин, односно пушење цигари, “ рече др. Оливер Зафировски.
Угостителите побараа одложување на рокот за да можат да ги подготват објектите, а во меѓувреме предлагаат да има засилена кампања. Тие велат дека новиот закон е огромен предизвик за нив, ќе им треба време, организација и поддршка од надлежните институции.
Според предложеното во законот, во рестораните и кафулињата ќе биде дозволено пушење само на терасите ако се отворени од 3 страни, а не како досега застаклени или преградени со фолии, а казните за непочитување ќе се движат од две до пет илјади евра.
Дополнително надлежните најавија и редовни контроли. Вкупно 300 инспектори, од кои 120 пазарни и 180 трудови, ќе вршат засилени контроли низ целата држава. Министерот за економија Бесар Дурмиши претходно потврди дека нема да има толеранција за прекршителите, без разлика дали станува збор за физички или правни лица.
Со новиот закон пушењето ќе биде забрането и пред здравствени установи, училишта, градинки, министерства и други јавни институции.
