– Министерката за енергетика, рударство и минерални суровини Сања Божиновска е дел од државната делегација предводена од претседателката Гордана Сиљановска-Давкова, која учествува на лидерскиот самит во рамките на 31. конференција на страните на рамковната конвенција на Обединетите нации за климатски промени (COP31), што се одржува во Анталија, Република Турција.
Како претставник на македонскиот енергетски сектор министерката Божиновска е дел од меѓународниот собир на кој присуствуваат лидери и високи претставници од 191 земја, а во фокусот се одлуките и политиките што ќе ја определат динамиката на глобалната енергетска и климатска транзиција. Нејзиното присуство е важно за непосредно следење на новите меѓународни насоки, размена на искуства со земјите учеснички и согледување на можностите за партнерства и инвестиции што може да ја поддржат трансформацијата на македонскиот енергетски систем – се наведува во соопштението од Министерството за енергетика, рударство и минерални суровини.
За Македонија, како што се нагласува, ова прашање има особено значење во период кога државата поставува амбициозни климатски цели – намалување на нето-емисиите на стакленички гасови за најмалку 80 проценти до 2035 година и постигнување климатска неутралност до 2050 година. Нивното исполнување во голема мера зависи од промените во енергетиката: зголемување на производството од обновливи извори, модернизација на електроенергетската инфраструктура, подобрување на енергетската ефикасност и обезбедување стабилно и достапно снабдување со енергија.
Токму затоа, присуството на министерката Божиновска на COP31 е можност националните енергетски приоритети да се согледаат во контекст на глобалните политики, новите технологии и финансиските механизми за нивна реализација. Посебно значајни се меѓународната поддршка и инвестициите потребни за забрзување на енергетската транзиција, при што промените треба да бидат економски одржливи и да обезбедат сигурност за граѓаните и стопанството.
Лидерскиот самит во Анталија, кој се одржува на 11 и 12 ноември, е посветен на преминот од преземени климатски обврски кон нивно конкретно спроведување. За Македонија, учеството во овие разговори е значајно за да биде дел од процесите во кои се обликуваат идните енергетски политики и да ги искористи можностите за соработка, што ќе придонесат кон побрз развој на почист, посигурен и поконкурентен енергетски сектор – наведуваат од Министерство за енергетика, рударство и минерални суровини.
