Владата донесе одлука Фахрудин Хамиди и Љубе Стаменковски да бидат разрешени од директорските позиции во Македонската навигација. На нивно место доаѓаат Илир Мемети и Милан Корач. Оваа одлука сега треба да ја спроведе Надзорниот одбор на М-НАВ. Мемети и е познат на јавноста како поранешен директор на Управата за цивилна и воздушна пловидба(УЦВП). За време на неговотото директорување, си ја носеше сопругата на патување во Мадрид , а приватно патувал и во Сингапур на сметка на Управата. Државниот завод за ревизија тогаш утврди дека потрошил над 8000 евра за приватни патувања. Освен тоа, ревизорите забележале и исплати на други сомнителни фактури, непочитување на Законот за јавни набавки, ненаменско трошење пари без соодветни одлуки од Владата. Милан Корач, пак беше оперативен техничар во М-НАВ. Сега ќе биде секторски директор, на местото на Љубе Стаменковски кој инаку во декември си ја поднесе оставката, а Владата денеска веројатно само ја констатираше.
На денешната седница не било предложено разрешување на членот на Управниот одбор и директор на М-НАВ, Хасим Деари. Објаснувањето е дека „Деари бил неодамна назначен на оваа позиција и дека не бил дел од проблемот во М-НАВ“.
Предлог разрешувањата следат откако во четвртокот, група од осуммина, предводена од советникот од редовите на ДУИ, Беким Незири упадна во контролната кула. Сепак, Владата не закажа вонредна седница веднаш, реши да се одмори за Божиќните празници, па на редовна седница одлучуваше по ова прашање, откако премиерот се консултирал со министерката за одбрана и министерот за транспорт и врски под чие министерство е Македонската навигација.
Од Синдикатот на Контролори за летање кои се заканија со затворање на македонското небо, соопштија дека штрајкот го ставаат во мирување.
За сега го ставаме штрајкот во мирување, но чекаме што ќе одлучи и како ќе постапи Надзорниот одбор. Ако има позитивна реализација на препораката од Владата, ќе ја повлечеме одлуката за штрајк – вели Александар Тасевски, претседател на Струков синдикат на Контролори на летање.
Тие денеска се сретнаа со претседателот Стево Пендаровски, кој ги поддржа заложбите на синдикатот за одржување на професионалното ниво во функционирањето на М-НАВ, која што е дел од критичната инфраструктура во државата.
Во меѓувреме, институцијата ја тресе финансиската полиција, која го истражува досегашното работење на М-НАВ, во делот на финансиите и јавните набавки.
