Заедно со министерот за внатрешни работи, Панче Тошковски, денеска присуствувавме на првиот состанок на Работната група за подготовка на итни законски измени насочени кон подобрување на системот за спречување и заштита од насилство врз жените и семејното насилство, напиша заменик замник-министерот за социјална политика, демографија и млади Ѓоко Велковски на својот фејсбук профил.
-Работната група е формирана согласно заклучоците од Итната седница на Националното координативно тело за имплементација на Конвенцијата на Советот на Европа за спречување и борба против насилството врз жените и семејното насилство. Во работата на групата се вклучени претставници од повеќе институции, Министерство за социјална политика демографија и млади, Министерство за внатрешни работи, Министерство за здравство, Министерство за образование и наука, Министерство за правда, судството, академската заедница, граѓанскиот сектор и други надлежни институции и организации кои со својата работа или делокруг на надлежности имаат поврзаност со проблематиката односно работата со насилство врз жени и семејно насилство, се вели во постот на Велковски.
Се нагласува дека целта е преку измени и дополнувања на повеќе закони да се подобри практичната примена на законските решенија и дополнително да се зајакнат механизмите за спречување на насилството и заштита на жртвите.
-До следниот состанок, институциите ќе достават конкретни предлози за законски измени, како и предлози за подобрување на подзаконските акти, правилниците и протоколите,прецизира Велковски на својот Фејсбук профил.
