„Нема сомнеж дека Македонците се Македонци и македонскиот јазик е македонски, и жално е што треба ова да се напоменува, но таква е ситуацијата“. Известувачот за Македонија во Европскиот Парламент Томас Вајц во интервју за бугарската национална телевизија – БТВ ги повика Бугарите да престанат да ја блокираат европската интеграција на земјава.
Зборувајќи за извештајот кој ќе го презентира, уште еднаш потврди дека во неколку наврати се признава посебноста на многувековниот македонски идентитет и јазик.
Нема сомнение дека Македонците се Македонци и дека македонскиот јазик е македонски јазик. Дури и жалам што треба да го кажам тоа. Македонскиот идентитет е доведен во прашање не само од бугарските соседи, туку и претходно од грчките соседи. Затоа нацрт-извештајот ја вклучува реалноста за независен македонски идентитет и јазик, тие се јасно споменати“ рече Вајц, пренесува БТВ.
Известувачот очекува мнозинствотвото да го поддржи, како што вели, конструктивниот извештај, бидејќи најголем дел од групите во Европскиот парламент ги поддржуваат евроинтеграциите на Македонија. Сепак е свесен дека нацрт-текстот нема да им се допадне на бугарските европратеници. Дел од нив оделе и до таму, што го обвинувале за пристрасност.
Заедно со моите колеги од либералите, социјалдемократите и Европската народна партија, се обидуваме да подготвиме реален извештај за ситуацијата во која се наоѓаме. Се потрудив напорно да ги вклучам бугарските членови на Европскиот парламент и нивните легитимни барања, како и бугарската заедница да се спомене во извештајот. Во мојот нацрт, бугарската заедница е конкретно спомената еднаш, додава Вајц.
Извештајот во Европскиот Парламент каде се признава посебноста на македонскиот идентитет и јазик, силната поддршка од голем број земји членки на ЕУ, пораките од европските челници дека ќе помогнат да се најде решение за блокадата од Бугарија – според упатените, овие случувања се знак дека Македонија може да излобира за фер и достоинствено пристапување кон ЕУ. Во една засилена дипломатска офанзива на Македонија и непопуштање пред барањата од нашиот источен сосед, Бугарија како да се најде во небрано. Декларацијата која беше едногласно донесена во бугарскиот Парламент, во која се повкува Македонија да ги направи уставните измени, до толку повеќе покажува дека единствениот адут на Бугарите се уцените – бидејќи така беа навикнати од претходната Влада која во 2022 година го прифати францускиот предлог.
