Укинување на балансерот, намалување на бројот на пратеници во Собранието од 120 на 90, реорганизација на министерствата, една изборна единица, укинување на позицијата заменик дирекор, помалку управни и надзорни одбори кои ќе имаат помалку членови – ова се главните проекти на ВМРО-ДПМНЕ за институционална реформа на Македонија опфатени во изборната програма Платформа 1198.
Во програмата која се потпира на 6 клучни столбови има 1198 проекти.
Лидерот на ВМРО-ДПМНЕ, Христијан Мицкоски посочи дека еден од главните услови за коалицирање со неговата партија ќе биде укинување на балансерот, односно вработување по основа на национална припадност, вели истиот дискиминира и фаворизира.
Ова е услов исто така, кој сака да биде во коалиција со идниот убедлив победник на следните избори, ВМРО-ДПМНЕ и коалицијата која ја предводи ќе мора да седне и да преговара и да се сложи за укинување на балансерот, затоа што цениме дека е неправичен, дека фаворизира, дека дискриминира, рече Мицкоски.
Најави доколку ВМРО-ДПМНЕ дојде на чело на Владата ќе има реорганизација на институциите – ново министерство за енеретика, министерство за социјална политика, демографија и млади, а делот за труд да биде припоен кон министерството за економија.
Планираме отворање на едно ново министерство а тоа е министерството за енергетика рударство и минерални суровини и цениме дека е премалку еден сектор во министерството за економија кое многу слабо ја вршеше работата. За младите е многу важно да планираме министерство за спорт и досегашната Агенција за млади и спорт да биде трансформирана во министерство за спорт, а секторот млади да го поврземе со едно ново министерство кое што ќе биде формирано, а ќе биде практично наследник на министерството за труд и социјална политика а тоа е министерството за социјална политика, демографија и млади, а делот од труд ќе биде поврзано со министерството за економија и труд, рече Мицкоски.
Во партиската програма е предвидено и намалување на бројот на пратеници на 90, Македонија да биде една изборна единица со што воедно ќе се овозможи и непречено гласање на дијаспората.
Во Платформата одвоен е и дел за враќање на довербата во судството, која речиси сега и не постои. Мицкоски посочува – за да го направиме тоа мораме да почнеме од вистинскиот проблем а тоа е судскиот совет и советот на јавни обвинители, безусловно распуштање на овие две структури, а понатаму формирање на истите врз основа на вистински критериуми, критериуми кои ќе значат заштита на правдата.
