Со новиот закон за работно ангажирање, кој стапи на сила од почетокот на годинава, државата им отвори врата на илјадници пензионери и студенти. Тие сега можат легално да работат без да ги изгубат пензиите и стипендиите.
На овој начин, за првпат во Македонија се регулира сезонското и привремено работно ангажирање. Целта е да се намали сивата економија и да се овозможи флексибилен начин на дополнителна заработка, особено во угостителството, кое со години е на колена поради недостаток на кадар.
И додека едни се скептични дека ова ќе функционира и чекаат да им пристигне работна сила од азиските земји, други веќе успешно се подготвуваат за претстојната сезона, враќајќи ги токму пензионерите на работните места.
„Сметам дека во угостителската гранка тоа ќе оди малку тешко. Кувари со искуство ретко се слободни, а во другиот дел работата е физички малку исцрпувачка, така што не верувам дека ќе вроди со плод во поглед на угостителството, освен во делот во кујната“, вели Игор Целески, менаџер на угостителски објект.
„Да, јас веќе имам вработено доста пензионери со договор на дело, како што наложи законот, и јас сум прилично задоволен. Бидејќи, ајде да бидеме малку искрени, шега на страна, младата генерација е поразлична од другите генерации. Постарите знаат да ја ценат работата и ја извршуваат професионално и со волја“, вели Рашид Муса, сопственик на угостителски објект.
Експертите по туризам го поздравија новото законско решение. Секој што се чувствува работоспособно треба да се вклучи на пазарот на трудот. Ова е олеснителна околност и за студентите, не само за пензионерите.
„Студентите ќе можат без проблем да работат, да бидат осигурани, а целта е всушност да се следи текот на парите. Да се укине онаа практика на сива економија, каде што добар дел од вработените во угостителството беа плаќани во кеш. Добро е и за угостителите, добро е и за државата и за вработените, оние кои ќе работат, бидејќи ќе се евидентира нивниот стаж“, вели проф. д-р Климент Наумов, универзитетски професор.
Легалното работно ангажирање им овозможува работно искуство на студентите. Што се однесува на пензионерите, тие до неодамна имаа ограничени опции. Можеа да работат само со договор на дело или авторски договор, при што работодавецот плаќаше 10 отсто персонален данок, но без социјални придонеси.
