🎥 Удар врз нелегалното коцкање – државата блокира над 250 сајтови

За неполни три месеци забранети  над 250 веб страници за нелегално коцкање. Дополнително до крајот на август ќе се затворат уште педесеттина интернет страници кои немаат лиценца за он лајн приредувачи на среќа, најави министерот за дигитална тррансформација, Стефан Андоновски. Државата им зададе сериозен удар на нелегалните интернет коцкарници,  кои се шират со пандемиски размери. Праксата покажува дека добар дел се  малолетници, кои за да можат да играт ги користат документите на родителите, по што стануваат лесна мета за кражба на лични податоци, но и празнење на банкарските сметки.

„Очекувам дека нови педесеттина ќе бидат забранети до крајот на месецот. Продолжуваме понатаму за да ја заштитиме младината од овие предатори на интернет кои сакаат да ги украдат податоците на граѓаните, да ги злоупотребат банкарските сметки. Мислам дека оваа акција е доста успешна секако ќе постојат начини тие да ги изиграат законите. Внимателно ја следиме ситуацијата и мислам дека реагираме на време„ изјави министерот за дигитална трансформација, Стефан Андоновски.

Министерот Андоновски, го коментираше и извештајот на Државниот завод за ревизија, посебно за системот ИПР, во кој влегува и исплатата на платите. Тој посочи дека  во изминатите две години системот не функционирал, но веќе се работи на надминување на недостатоците со што ќе се понуди поголема сигурност и достапноист на сите институции кои се надвор од Службата за општи и зеднички работи.

Андоновски,  во Свети Николе, присуствуваше на отварање на Центар за услуги, каде граѓаните ќе имат поголема достапност до електронските услуги без да одат од една до друга институција.

„Сите странки, не мора да одат по другите институции за да извадат различни документи. Може да дојдат во новоотворената канцеларија и да си ги извадат документите од типот М1 и М2 образец, државјанство, листа за стаж и многу други документи што ги нудат органите во Р.Македонија„ изјави градоначалникот на Свети Николе, Дејан Владев.

Се планира до крајот на летото да бидат отворени  Центри за услуги, уште во три други градови во државата, од планираните десет за оваа година.