Ново и модерно училиште за 713 основци. Во скопската населба Ченто интезивно се работи на изградба на објектот „Крсте Мисирков“, кој според најавите треба да биде завршен пред предвидениот рок. Министерката за образование Јаневска, заедно со градоначалникот Стефковски, денеска извршија увид на градежните активности. Училиштето кое е во изградба, ќе се простира на приземје и кат, со површина од 3150 квадратни метри и ќе располага со 30 кабинети.
„Оваа влада со општините посветува внимание на инфраструктурата, во моментов градиме осум училишта и реновираме бројни други во износ од 32 милиони евра“, изјави Весна Јаневска, министерка за образование.
„Се работи посветено, и очекувам истиот да биде завршен пред рокот од 24 месеци рок, утврден во договор со економски оператор. Како локална самоуправа остануваме на посветеноста за изградба на инфраструктура во делот на образованието“, изјави Бобан Стефковски, градоначалникот на Гази Баба.
Во изминатиот период, во Гази Баба се изградија и две нови спортски сали, а во тек е и изградбата на трета во основното училиште „Наум Охридски“ во Црешево. До крајот на годината треба да започне и изградбата и на четврта сала во населбата Железара.
Од Локалната и централната власт порачаа дека образованието и во иднина ќе биде врвен приоритет и дека со ваквите инвестиции, се создаваат подобри и подостојни услови за образование на учениците.
