По години застој и нефункционални решенија, високото образование и науката добиваат целосно нова законска рамка. Три нови закони за подобрување на состојбите, ставени на маса за распарава. Ресорното министерство ги презентираше – Законот за високо образование, Законот за квалитет во високото образование и Законот за научно – истражувачка дејност, кои треба постават повисоки стандарди, да ја зголемат конкурентноста и да го подобрат квалитетот.
Нов начин на финансирање на универзитетите, построги критериуми при апликација за доцент, вонреден или редовен професор, се дел од промените кои ги носи законот за високо образование. Со истото законско решение се опфатени студентите кои користат стипендии и поажуваат одлични резултати на наши или странски универзитети. За нив е предвидено да имаат предност при вработувањето на државните универзитети.
„Ќе започнам со убава вест за студентите кои со стипендија од државата студираат на најдобрите 100 светски универзитети или пак студираат во Македонија и се добитници на Инженерски прстен или се прогласени за најдобри студенти на универзитетот. Тие ќе имаат предност при вработувањето на државните универзитети, како наставно – научен кадар.“
„Секој кој ќе аплицира за избор во звање – доцент, вонреден или редовен професор, отсега ќе има обврска до изборот да изработи и објави најмалку 6 – 7 научни трудови, од кои 3 – 4 треба да бидат објавени во списание со импакт фактор од базите Web of science или Scopus.“- вели министерката за образование и наука, Весна Јаневска.
Новиот закон за квалитет на високо образование има за цел да ја врати улогата на истоимената агенцијата, која со години вршела акредитации на студиски програми, но не и евалуација.
„Новина е наместо два одбори за акредитација и за евалуација, законот предвидува еден Совет кој ќе работи со стручни комисии. Дефинирање на постапките за евалуација, самоевалуација, акредитација, надзор над работата на високообразовните установи и научно – истражувачките субјекти и така натаму.“- вели Јаневска.
Законот за научно истражувачка дејност предвидува доделување средства за научно- истражувачки проекти, финансирање на научни институти, јасно дефинирање на постапки за избор во научни звања на истражувачите и слично. Законите за високо образование и квалитет на високо образование се објавени на ЕНЕР системот и се отворени за критики и сугестии, а законот за научно истражувачка дејност ќе биде објавен во текот на наредните денови.
