Екс-претседателот на САД и актуелен републикански кандидат за нов мандат во Белата куќа, Доналд Трамп во својот прв јавен настап по вториот обид за атентат раскажа детали за она што го доживеал во неделата во неговиот голф клуб „Вест Палм Бич„ на Флорида.
Тој рече дека слушнал истрели додека играл голф со пријатели, меѓу кои бил и бизнисменот Стив Виткоф.
„Се беше прекрасно, убаво место да се биде и одеднаш слушнавме пукотници во воздух. мислам дека беа четири или пет. звучеа како куршуми, но што знам јас за тоа. Но, тајната служба веднаш знаеше дека се работи за куршуми“, рече Трамп.
Тој, дополнително, ѝ се заблагодари на тајната служба, која, како што кажа, одлично си ја завршила работата. Откако ги слушнале истрелите, вели Трамп, веднаш влегле во возилата за движење низ голф терените и брзо заминале од местото.
Пукотниците, како што кажа Трамп, биле истрели од оружјето на друг агент на тајната служба кој пукал кон цевка од пушка што ја забележал вперена од грмушките кон теренот за голф и дека „другиот не пукал“, притоа најверојатно мислејќи на осомничениот напаѓач.
Инаку,Трамп се обиде да ги обвини претседателот Џо Бајден и потпретседателката Камала Харис за пукањето. „Нивната реторика предизвикува пукање кон мене, кога јас сум тој што ќе ја спаси земјата, а тие се оние кои ја уништуваат земјата, и одвнатре и однадвор.
„Тоа се луѓе кои сакаат да ја уништат нашата земја. тоа се нарекува внатрешен непријател. Тие се вистинската закана“, изјави Трамп.
