277 електорски гласови за Доналд Трамп, наспроти 224 за Камала Харис. Проекциите на сите водечки американски медиуми покажуваат дека поранешниот претседател повторно ќе влезе во Белата куќа.
Победата на Трамп доаѓа откако тој успеа да освои мнозинство гласови во неизвесните сојузни држави Пренсилванија, Џорџија и Висконсин каде на минатите избори Џо Бајден однесе победа.
Се уште се чекаат резултатите за Аризона, Невада, Мичиген и Алјаска, но тие нема да влијаат на крајниот исход зашто Доналд Трамп веќе го има потребниот број на гласови.
Тој во победничкиот говор од Флорида порача дека доаѓа златно доба за Америка.
Камала Харис, пак, не се обрати пред толпата поддржувачи во Вашингтон. Од нејзиниот изборен штаб рекоа дека ќе одржи говор во текот на денешниот ден, говор во кој се очекува дека ќе го признае изборниот пораз.
За конечните резултати од изборите треба да поминат неколку дена, додека не заврши пребројувањето во сите сојузни држави.
Доналд Трамп треба да биде инаугуриран за нов мандат на 20 јануари, 2025 година.
Трамп беше на претседателската функција од 2017 до 2021 година, но беше поразен од Бајден на изборите во 2020 година.
Успехот на Републиканците се прошири и на Конгресот, каде што партијата го врати мнозинството во Сенатот со најмалку 51 од 100 места. Контролата на Претставничкиот дом, пак, која во моментов ја имаат Републиканците, се уште не е конечно решена.
