Министерот за внатрешни работи Панче Тошковски и премиерот Христијан Мицкоски, во друштво на директорот на БЈБ Александар Јанев, на јавноста преку видео обраќање ги покажаа како изгледаат запленетите 40 тони марихуана.
Тошковски најави дека продолжуваат активно со работа со цел да се отстранат овие огромни количини на дрога, која била наменета за шверц, но и за домашниот нарко пазар.
Премиерот Христијан Мицкоски најави формирање владина комисија која ќе го испитува работењето на правните субјекти поврзани со случајот со 40 тона цвет од канабис, посочувајќи дека станува збор за последица на, како што рече, погрешни политики од минатото.
Мицкоски информира дека на денешната седница на Владата се очекува да биде донесена одлука за формирање тим кој ќе влезе во повеќе компании, ќе ја утврди фактичката состојба и ќе констатира кои субјекти работеле согласно закон, а кои го злоупотребиле.
„Очекувам дека денес на седница на Влада ќе се донесе одлука со која што ќе се формира комисија и тим која што ќе влезе во повеќе правни лица, ќе го испита работењето и ќе констатира фактичка состојба, кој се тие правни субјекти којшто работеле согласно закон, а кој се оние правни субјекти којшто не работеле согласно закон и го злоупотребиле или го изиграле законот“, објави Мицкоски.
Тој порача дека криминалот повеќе не се исплати и дека сите кои сметаат дека можат да профитираат на незаконски начин ќе бидат откриени и строго казнети.
Видеото може да го погледнете на следниот линк:
