Нема крај на хаосот во јавниот превоз во Скопје. Денешната средба меѓу приватните превозници и директорот на ЈСП, Драги Кушевски, за малку ќе прераснеше во физичка пресметка. Причината – долгот што градското претпријатие го има кон приватниците во период од шест месеци. Тензијата ескалираше кога претставникот на приватните превозници, Јовица Зафировски, прво бурно реагираше на изјавата на директорот Кушевски дека долгот изнесува околу 60 милиони денари – што е речиси трипати помалку од сумата што тие ја бараат. Приватниците велат дека градското претпријатие им должи 170 милиони денари за шест месеци и дека повеќе не можат да возат под овие услови. Според нив ЈСП има има долг кон трите претпријатија „Јофи Бус“, „Радос“ и „Вестор Транс“.
„Ако не ни се уплати, ние без пари не можеме да продолжиме да возиме. Значи ние ќе чекаме стрпливо до понеделник нека не известат, ако има пари ние ќе продолжиме да возиме. Ние никогаш не сме правеле проблем за таа работа“, изјави Јовица Зафировски – приватен превозник „Јофи Бус“.
„Види ти си платил 10 милиони за март. Мене ми должиш уште 3 милиони за март. Кој месец сме сета? Кој месец сме сега?!“, изјави приватен превозник Менет Асами од „Вестор Транс“.
Дека состојбата со ЈСП не е идеална призна директорот Кушевски, но според него долгот не е толкав колкав што го кажуваат приватниците и ги обвини дека манипулираат со граѓаните.
„Ја знаеме состојбата во која се наоѓа ЈСП веќе години наназад. Но, тоа не ни е никакво оправдување. Откако сум дојден јас долгот се намалува. Долгот не е тој што беше кажан сега. Нека ги покажат финансиските картици. Долгот во моментов е околу за тројцата превозници 60 милиони денари…. Тоа не е точно, тоа не е точно… Покажете ги картиците… Ќе ги покажеме. Долгот само кон мојот пакет е 30 милиона“…
Приватниците ќе чекаат повик од Кушевски до понеделник и доколку средствата не им се уплатат, прво ќе почнат да возат редуцирано, а потоа ќе ги паркираат автобусите во гаража. И додека едните бројат долгови, а другите тврдат дека ги намалуваат, илјадници скопјани секојдневно ја плаќаат цената замрзнати на автобуските постојки, со часови чекајќи превоз.
