Почна вакцинацијата против сезонски грип. Годинава државата обезбеди 70.000 бесплатни дози за ризичните групи, а Центрите за јавно здравје располагаат со дополнителни количини за комерцијална употреба.
Бројките покажуваат дека има голема заинтересираност за вакцинирање, досега пријавени се околу 34 илјади граѓани. Дел од пациентите се вакцинираат прв пат оваа година и се надежни дека ќе се заштитат, но има и луѓе кои неколку години наназад редовно се имунизираат и велат дека вакцината е безбедна.
Интересот за имунизација е најголем кај повозрасната популација односно кај лицата над 65 години и лицата со хронично заболување велат докторите. Тие апелираат за да се избегнат сериозните последици од грипот постарите лица да се вакцинираат.
“Вакцината е добра, сигурно штити од компликации. Можеби нема да ги заштити да не се разболат од грип, меѓутоа ќе заштити од сериозни компликации, хоспитализации и несакан исход. Вакцината е четиритипна, содржи два типа на инфлуенца А и два типа на инфлуенца Б.” – рече доктор Цилевска Младеновска.
Право на бесплатна вакцина имаат ризичните групи, повозрасните лица над 65 години, лицата со хронични заболувања, здравствените работници, бремените жени, децата на возраст од 6 месеци до 5 години, како и лицата сместени во установи за социјална заштита на стари лица и вработените во установи за социјална заштита на стари лица.
Вакцинацијата ќе се спроведува на 36 локации во целата држава, а сите пријавени ќе добијат смс-порака за датумот, точното време и каде да дојдат за вакцинација.
