Арбен Таравари осамен заминува во прегратките на Али Ахмети. Четворица пратеници од неговото крило на Алијанса за Албанците ќе останат со коалицијата Вреди, вели министерот за социјална политика, демографија и млади Фатмир Лимани. Според него ДУИ и Европскиот фронт не треба да сметаат дека ќе бидат засилени во коалицијата со решението на Таравари да оди во опозиција, бидејќи од пет министерот за здравство во заминување може да остане со само еден народен избраник.
-Ако тие мислат дека се комотни на тоа дека дел од пратениците на Алијанса на Албанците поминале кон фронтот се погрешни, бидејќи дел од нив ќе останат со Владата, но да се сигурни дека најмалку четири од пратениците што се денес во нивните редови ќе поминат во делот на владината коалиција, изјави Лимани.
Останува непознато дали вицепремиерот за добро владеење Арбен Фетаи ќе остане на својата позиција. Вицепремиерот и министер за животна средина Изет Меџити вели наредниов период ќе се разговара со него, по што ќе се знае дали тој ќе биде рарешен. Според него одлуката на Таравари е лична и е контра онаа на членството на Алијанса за Албанците.
-Има донесено одлука која што кореспондира со членството и структурите на партијата, има видливи поделби, тие веќе ги гледаме секојдневно. Ова е лична одлука, од лични побуди и не корсепондира со волјата на членството посебно на Алијанса за Албанците, која што од своето формирање е антипод на ДУИ, изјави Меџити.
Членот на претседателството на Алијанса и политички советник на Арбен Таравари во Министерството за здравство Сабри Азири, се спротистави на одлуката на партијата да излезе од Владата. На социјалните мрежи истакна дека на последниот состанок го повикал членството да му се придружат во продолжувањето на вистинскиот пат на Алијанса на Албанците. Пишува дека народот и гласачите им го дале гласот за да ги претставуваат во најдобро светло, а не да ги изневерат.
-На последниот партиски состанок, пред највисоките партиски органи, јавно кажав: Кој мисли да дојде со мене за заедно да продолжиме да ја водиме Алијансата за Албанците во правец за кој мандат ни дадоа гласачите – повелете да одиме напред! Кој има поинаква замисла – нека си продолжи по друг пат! Јас и таквите како мене нема да дозволиме уште еднаш да се делиме ниту да ја предадеме Алијансата за Албанците во туѓи прегратки!, пишува Азири.
Министерот за здравство најави, дека тој ќе поднесе оставка, а очекува останатите функционери од неговата партија да бидат разрешени.
Матеја Петровски
