Малку сака па малку не сака во Влада. Се заканија дека ќе ја напуштат владината коалиција, ама може на избори да одат на заеднички листи со ДУИ и СДСМ. Партијата на Таравари очигледно не знае што сака.
Алијанса на Албанците, откако пред само неколку дена рекоа дека размислуваат да го напуштат политичкиот брак со Ахмети и Ковачевски, сега размислувале за можноста со нив заеднички да настапат на претстојните избори. Првиот човек на партијата призна дека се разговара за оваа тема и посочи дека истата не е затворена.
Разговаравме за опцијата да одиме заедно на избори, со една изборна листа. Но, искрено јас сметам дека во моментов е малку проблематично за нас како партија да бидеме со ДУИ на една листа, но никако не го затвораме тоа како прашање. Ќе направиме анализа, ќе разговараме со членството и следната недела ќе донесеме одлука, рече Таравари.
Но во истото гостување каде што го најавува ова, тој повторно се закани дека можеби ќе ја напуштеле владат ако не поминат уставните измени.
Ние влеговме во Влада со една цел, да помогнеме на мнозинството на евроинтеграцискиот пат на Македонија. Ние станавме дел од Владата за да помогнеме да се соберат 2/3 од пратениците и да се изгласаат уставните измени. Ако тоа не се случи, тогаш ќе го свикаме централното раководство и ќе одлучиме што понатаму, дали ќе продолжиме со ова мнозинство или ќе одиме во опозиција, вели Таравари.
Прашањето е што сака всушност Алијанса? Дали Таравари навистина сака да замине од колаицијата со ДУИ и СДСМ, но внатрешното крило кое е блиско до поранешниот претседател на партијата Села, не дозволува или пак Таравари дава вакви изјави за да добие поголема сила во коалицијата, оти без нив Владата ќе нема ни просто мнозинство.
Но јасно е дека можеби токму партијата на Таравари ќе биде единствената сламка за спас, за на идните избори поразот на СДСМ и ДУИ, ако одат на заеднички листи, не биде толку катастрофален. Според анкетите дури и Алијанса да остане со партиите од Мала Речица и Бихаќа, сепак новата влада би ја формирале ВМРО-ДПМНЕ и албанскиот опозициски блок, однонсо Алтернатива, Беса и Демократско движење.
Според дел од аналитичарите, поразот на сегашната влада е сепоизвесен, но доколку со заеднички листи одат АА, ДУИ и СДСМ, најголем губитник би биле социјал-демократите,заради добитните места на листите, бидејќи Таравари и Ахмети ќе бараат добитни позиции, а тие позиции ќе треба да бидат дадени , односно одземени од СДСМ, со таквата политка, социјал-демократите ќе останат со малку нивни пратеници во собранието, а на идните избори, Ковачевски би можел да се соочи и со сценарио каде би ја довижеал судбината на Шекеринска од 2008 година.
