Светската здравствена организација (СЗО) донесе одлука за „замрзнување“ на вработувањата и значително намалување на трошоците за патувања како одговор на повлекувањето на Соединетите Американски Држави од организацијата, кои се нејзиниот најголем финансиски донатор, се наведува во интерна порака испратена до персоналот.
„Како што знаете, Соединетите Американски Држави објавија повлекување од СЗО. Жалиме за оваа одлука и се надеваме дека новата администрација ќе го преиспита својот став“, напиша генералниот директор на СЗО, Тедрос Аданом Гебрејсус, во пораката до вработените, пренесува „Политико“.
Тој истакна дека одлуката на САД дополнително ја влошила финансиската состојба на организацијата и предизвикала значителна загриженост и несигурност меѓу вработените.
Инаку, дека САД ќе се повлечат од Светската здравствена организација (СЗО) на 22 јануари 2026 година, соопштија Обединетите нации откако беа официјално известени за одлуката од претседателот Доналд Трамп. Тој ја обвини организацијата за лошо справување со пандемијата на Ковид-19 и други глобални здравствени кризи.
Трамп ја најави одлуката во понеделникот, неколку часа откако положи заклетва за втор мандат. СЗО изрази жалење за одлуката на САД, кои се најголем донатор на организацијата, со учество од околу 18 отсто од нејзиното финансирање.
Согласно заедничка резолуција на Конгресот од 1948 година, САД мора да достават претходно известување од една година за повлекување и да ги подмират финансиските обврски кон СЗО.
– Можам да потврдам дека го примивме писмото од САД за повлекување од СЗО. Повлекувањето стапува во сила на 22 јануари 2026 година, изјави заменик-портпаролот на ОН, Фархан Хак.
Според наредбата за повлекување, администрацијата ќе ги прекине преговорите за пандемискиот договор на СЗО, ќе го повлече американскиот персонал што соработува со организацијата и ќе бара нови партнери за активности поврзани со здравствените кризи.
